Орусиялык сайтта сатылып жаткан кыргыз паспорттору. ИИМдин өкүлчүлүгү бул ишти колго алды

Орусиялык сайттардын биринде кыргыз паспорттору 15 миң рублга сатылып жатканы айтылган. Ал эми Мамлекеттик каттоо кызматы бул маселе боюнча Орусияга расмий кат менен кайрыла турганын маалымдаган.

Кыргыз өлкөсүнүн Ички иштер министрлигинин Орусиядагы өкүлчүлүгү сатылып жаткан жасалма паспорттор боюнча тийиштүү чараларды көрөт. Маалыматты ИИМдин басма сөз кызматынан билдиришти.

"Жасалма документтерди айрымдары материалдык жеңилдиктерди алыш үчүн, айрымдары милдеттерден качуу максатында алышат. 2019-жылы ИИМдин өкүлчүлүгүнүн кызматкерлери Орусиянын укук коргоочулары менен биргеликте жасалма документ жасаган бир нече фактыларды аныкташкан.

Биздин өкүлчүлүк менен Орусиянын көзөмөл комитети жарандарга жасалма паспортторду сунуштаган сайттарды аныктап, алардын ишмердүүлүгүн токтотот. Буга чейин аймактык сот "PRAVABZ" сайтына интернетке кирүүгө чектөө киргизген. Бул сайт Орусиянын аймагында ишмердүүлүгүн жүргүзгөнгө тыюу салынган сайттардын катарына мыйзамдуу (Домендик даректердин бирдиктүү реестри) түрдө кирген. Бирок шылуундар домендик даректерди алмаштырып алып, өзүнүн ишмердүүлүгүн жүргүзүп жатышат.

Ал эми биометрикалык ID-карталар Кыргыз өлкөсүндө 2017-жылы берилип баштаган. Андан бери Орусиянын аймагында жасалма биометрикалык паспорт колдонгондор аныктала элек. Учурда эки өлкөнүн укук коргоо кызматкерлери жасалма паспортторду даярдаган жарандарды аныктоо максатында ыкчам издөө иштерин жүргүзүп жатат", - деп билдирет маалымат катчы.

Эгерде жасалма документтерди сатып же мыйзамсыз иш менен алектенип жаткандар тууралуу маалымат билгендер болсо, ИИМдин Орусиядагы өкүлчүлүгүнө маалымат берип коюну өтүнөт.

Байланыш номерлери: +7 (926) 890-87-00. Анонимдүүлүк сакталат.