Жактоочу: "Кримтөбөл Батукаевдин иши боюнча Улуттук гематология борборунун дарыгери көрсөтмө берди"

Кечээ, 4-февралда Бишкектеги Биринчи Май райондук сотунда кримтөбөл Азиз Батукаевдин абактан мыйзамсыз бошотулушу боюнча соттук отурум жабык өттү.

Анда Улуттук гематология борборунун дарыгери күбө катары сурак бергенин жактоочу Замир Жоошев айтты.

"Күбө болгон дарыгер Дамира Байзакова Батукаевдин иши боюнча депутаттык комиссиянын курамына кирген экен. Комиссияга медициналык документтер, анализдердин негизинде Батукаев чындыгында эле рак илдети менен ооруган деген корутунду чыгарышкан. Бирок күбө болгон дарыгер, ал анализдер чындыгында эле Азиз Батукаевге тиешелүү экенин так айталбашын билдирди. Башкача айтканда, комиссия иликтеген медициналык документтер башка адамдыкы деле болушу мүмкүн. Жактоочулардын аны кантип аныктаса болот деген суроосуна күбө Батукаевдин өзүнөн кайрадан анализ алыш керек деп жооп берди. Бирок депутаттык комиссиянын корутундусу юридикалык күчкө ээ эмес экенин белгилеп өткүм келет. Анткени анализдер боюнча соттук-медициналык экспертиза жүргүзүлгөн эмес. Мындан тышкары, дарыгер Азиз Батукаев ооруса, азыр тирүү жүрмөк эместигин айтты. Менин "Анын тирүү экенин кайдан билдиңиз?" деген суроомо "массалык маалымат каражаттары аркылуу" деп жооп берди", - дейт жактоочу.