Тажикстан аркылуу Кытайдан Баткенге келген эки жарандан коронавирус аныкталдыбы? Министрликтин жообу

5-февраль күнү Кызыл-Бел көзөмөл-өткөрүү жайы аркылуу Кытайдан Баткенге келген эки жарандын дене табы көтөрүлүп, изоляторго жаткырылганы тууралуу маалымат тараган. Окуя тууралуу Саламаттыкты сактоо министрлиги төмөнкүдөй маалымат берди.

"Баткен облустук ооруканасына эки жаран коронавируска күмөндөлүп жаткырылды деген маалымат чындыкка дал келбейт. Бүгүнкү күнгө карата Кыргыз өлкөсүндө коронавируска кабылган адам каттала элек. Өлкө аймагында эпидемиологиялык абал туруктуу.

Эки жаран Кытайдан Тажикстан аркылуу келгендиктен, санитардык-карантин бөлүмүнүн кызматкерлери талапка ылайык аларды көзөмөлдөө үчүн саламаттыкты сактоо бөлүмүнө алып келген. Учурда эки жарандын тең абалы канааттандырарлык. Алардан тиешелүү анализдер алынган, анализдердин жыйынтыгына карап, мындан аркы чаралар көрүлөт", - деп билдирди министрликтен.