Укук коргоочу Токтайым Үмөталиева: "Сооронбай Жээнбеков Айдар Акаевдин сөөгүн мекенине алып келүү боюнча чечим чыгарышы керек"

"Мамлекет башчы Сооронбай Жээнбеков башына оор кайгы түшкөн экс-президент Аскар Акаевге жардам бериши керек", - деп билдирди укук коргоочу Токтайым Үмөталиева.

Анын айтымында, каза болгон Айдар Акаевдин сөөгү өз мекенинде жерге берилиши керек.

"Эч кимдин башына мындай кайгы түшпөсүн. Тунгуч президенттин башына кара күн түшүп турат. Тууганы, кийин уулу жаш кетти. Ал азыр кайгырып жаткан убакта ага жардам беришибиз керек. Ошол себептен менин сунушум мындай. Улуу урматтуу президент, эгерде элди бөлүп жарылуудан сактап калам десеңиз, комиссия түзүп, Москвага атайын бортту жөнөтүшүңүз керек. Кыргыз өлкөсүнүн Орусиядагы элчиси Аликбек Жекшенкуловго ыйгарым укук берип, Айдар Акаевдин сөөгүн өз мекенине алып келүүгө, аны акыркы сапарга узатууга шарт түзүп берүү кажет. Себеби ал кыргыздын жараны жана анын туугандары мекенинде гана сөөгүн жерге бериши керек. Президент саясий эмес адамгерчиликтүү чечим чыгарып, тунгуч президенттин үй-бүлөсүн өлкөгө кайтарып келиши шарт. Кандай гана болбосун, тунгуч президент деген наам бир гана Аскар Акаевде калат", - деп билдирет Үмөталиева.

Айрым маалымат булактары Айдар Акаевдин сөөгү Москвада 8-февраль күнү коюла турганын жазышууда.

Бүгүн, 6-февралга караган түнү Айдар Акаев 43 жашында каза болгону кабарланып, андан кийин эле Аскар Акаевдин агасынын уулу Кубан Акаевдин көзү өтүп, кечээ жерге берилгени маалым болгон.