12 миллион калк жашаган Ухан шаары ээнсиреп калды. Бийиктиктен тартылган видео

12 миллион калк жашаган Кытайдын Хубэй провинциясынын борбору - Ухан ээнсиреп калды. Кытай бийлиги коронавирустун күч алганына байланыштуу 23-январдан баштап бул аймакка карантин жарыялаган. Мындай жарыядан кийин 5 миллиондон ашуун жаран шаардан чыгып кетишкен. Учурдагы шаардын картинасын бийиктиктен тартылган видеодон көрсө болот.

Анда бир-эки жөө адамды, айрым гана көчөлөрдө велосипед тээп бараткандарды жана саналуу гана унааларды көрүүгө болот.

Учурда бул шаарда аэропорт, автобекеттер, соода борборлору жабылып, коомдук транспорт жана темир жол каттамдары токтотулган. Шаардагы бардык завод, фабрикалар, өндүрүш менен алектенген ишканалар жабылган.

Коронавирустун очогу болгон Хубэй провинциясында 549 адам каза болуп, 19 миңден ашуун киши жабыркады. Медицина кызматкерлери 6-февралдан баштап Ухан шаарындагы бардык тургундарды текшерүүгө алып баштады. Чет элдик басылмалардын маалыматына ылайык, шаардагы бардык үйлөрдүн жашоочуларын дарыгерлер текшерет.