Мухаммедкалый Абылгазиев Нарын шаарындагы сүттү кайра иштетүүчү заводдун иши менен таанышты

Премьер-министр Мухаммедкалый Абылгазиев Нарын облусуна жасаган иш сапарынын алкагында Нарын шаарындагы сүттү кайра иштетүүчү заводдун иши менен таанышты.

Аптасына 15 тоннага чейин сүттү кайра иштетүүгө мүмкүнчүлүгү бар завод өкмөттүн колдоосу менен ачылган. Завод аймактын социалдык-экономикалык жактан өнүгүүсүнө чоң салым кошот.

Өкмөт башчы Нарын облусунун мал чарбачылыгындагы дараметин эске алганда, мындай объекттер өнүгүүнүн негизги фактору болуп эсептелерин белгиледи.

Сырьёнун көлөмү жетишсиз болуп, завод толук кубаттуулукта иштей албай жаткандыктан, Мухаммедкалый Абылгазиев чийки заттын базасын көбөйтүү боюнча план иштеп чыгууну тапшырды. Өкмөт башчынын айтымында, зарылдыкка жараша сырьёнун жетишсиздиги боюнча маселени чечүү максатында кошумча лизинг жана насыялык линияларды ачуу шарт.

Мухаммедкалый Абылгазиев өкмөт мурдагыдай эле жер-жерлердеги мындай ишканаларга зарыл жардамды берерин айтты.