Президент Сооронбай Жээнбеков Валентина Шевченкону жеңиши менен куттуктады

Өлкө башчы Сооронбай Жээнбеков Валентина Шевченкону UFC'деги кезектеги жеңиши менен куттуктады. Бул тууралуу мушкер айым өзүнүн Инстаграмдагы жеке баракчасына жазып чыкты.

"Кыргыз өлкөсүнүн президенти Сооронбай Шарипович телефон аркылуу жеңишим менен куттуктады. Машыктыруучум Павел Федотовго жана эжем Антонина Шевченкого салам жолдоду. Бул чоң мотивация. Бизге абдан жагымдуу болду. Сооронбай Жээнбеков бизди жайында Ысык-Көлгө эс алып кетүүгө чакырды. Биз сөзсүз барабыз. Чоң рахмат, урматтуу президент", - деп калтырган Шевченко өз билдирүүсүндө.

Маалыматка ылайык, Валентина Шевченко кечээ, 9-февралда АКШнын Хьюстон шаарында өткөн UFC 247 турниринде америкалык Кэтлин Чукагянды техникалык нокаут менен жеңип, чемпиондук курун үчүнчү ирет коргоп калган.