ЖЭБ соту: Жолдошбек Назаров Аскар Акаевдин учурунда алган сыйлыгынан ажыраганын айтты

Бүгүн, 10-февралда Бишкек шаардык сотунда ЖЭБ иши боюнча жактоочулардын апелляциялык даттануулары каралды. Анда "Электр станциялары" ишканасынын башчысынын мурдагы орун басары Жолдошбек Назаров сурак берди.

"Свердлов райондук соту үй-мүлкүмө арест коюудан тышкары, бардык сыйлыктардан ажыратуу тууралуу да чечим чыгарган. Мен буга макул эмесмин. 90-жылдары өлкөдө энергетикалык кризис пайда болгондо, бир топ энергетиктердин иш-аракети астында ал каатчылыктан чыгып кеткенбиз. 2001-жылы ошол эмгек бааланып "Эмгек сиңирген энергетик" деген наам алгам. Бир гана мага эмес, бир топ адамдарга сыйлык тапшырылган. Ал кезде биз бир гана энтузиазм менен иштегенбиз. Анткени айлык алчу эмеспиз, анын ордуна ун, шекер, азык-түлүк берилчү. Бул тууралуу китеп жазыш керек. Азыр тескерисинче Акаевдин учурунда алган сыйлыгымдан ажыратып жатышат. Чынында азыркы иш менен 90-жылдардагы эмгегимдин кандай байланышы бар? Логиканы көрбөй жатам", - деген Назаров