Милиция кызматкери 27 жаштагы айымды зордуктап, эми ишти караган тергөөчү жабырлануучуну коркутуп жатыптыр

Бишкектин Биринчи Май РИИБинин кызматкери психикалык жактан жабыркаган жаранды зордуктап салганын бүгүн, 21-августта жабырлануучунун жактоочусу Елена Крапивина бизге билдирди. Айтымында, 19-июль түнү борбордогу батирлердин биринде жашаган жарандардын ортосунда уруш чыгып, алар милиция кызматкерлерин чакырышыптыр. Териштирүү иштери бүткөн соң милиция кызматкери 27 жаштагы Н.К. аттуу айымды зордуктайт. “Психикалык жактан жабыркаган айым коркконунан үн чыгарып, каршылык көрсөтө алган эмес. Окуядан кийин жабырлануучу “Эркиндик үнү” укук коргоо борборуна кайрылган. Мен жабырлануучунун укугун коргоп жатам”,- деди жактоочу. Кылмышка шектелип бир милиция кызматкери кармалганын, бирок Октябрь РИИБинин тергөөчүсү Шаршен Суранчиев тарабынан жабырлануучу тарапка кысым көрсөтүлүп жатканын билдирди. “Жабырлануучуну "арызыңды кайтарып ал" деп коркутушууда. Тергөөчүнүн бул иши боюнча 16-августта шаардык прокуратурага арыз жаздым, бирок азырынча прокуратурадан жооп келе элек”,- деди Евгения.