УКМК ишенип берилген мүлктү ыйгарып алуу жана коротуу фактысы боюнча "Тазалык" ишканасынын кызматкерлерин кармады

"Тазалык" муниципалдык ишканасынын башкы бухгалтери А.О., операторлор А.М. жана Б.Н. Улуттук коопсуздук мамлекеттик комитети тарабынан кармалды. Бул тууралуу аталган мекемеден маалымдашты.

Анда айтылгандай, "Тазалыктын" 3 кызматкери ушул жылдын 8-февралында Улуттук коопсуздук мамлекеттик комитети тарабынан жүргүзүлгөн ыкчам-тергөө иш-чараларынын алкагында, ишенип берилген мүлктү өзүнө ыйгарып алуу жана коротуу фактысы боюнча кармалган.

"2019-жылы "Тазалык" муниципалдык ишканасы 84 миллион сомдон ашык суммага майлоочу жана күйүүчү каражаттары талон түрүндө сатылып алынып, материалдык жооптуу кызматкерлерге берилгендиги аныкталган.

Бирок аталган ишкананын башкы бухгалтери операторлор менен биргеликте Бишкек шаарынын ичинде жумуш алып барууга багытталган күйүүчү май талондорун ыйгарып алып, короткон. Бул боюнча сотко чейинки өндүрүштүн материалдары Кыргыз Республикасынын Кылмыш-жаза кодексинин 205-беренесинин 3-бөлүгү (Ишенип берилген мүлктү ыйгарып алуу же коротуу) менен Кылмыштардын жана жоруктардын бирдиктүү реестрине катталды. Сот органдары тарабынан кармалган адамдарга 2 айга үй камагына алуу баш коргоо чарасы каралган. Учурда тергөө иштери жүрүп жатат", - деп айтылат.