Москвада таксист аны кемсинтип, жемелеп ал тургай кол көтөргөн аялды кечирди

Интернетке долуланып, туталанган жүргүнчү аялдын таксистти урушуп, ал тургай ага бир канча жолу кол көтөргөн видеосу тарады. Орусиялык басылмалар бул көрүнүш Москвада болгонун, видеону таксист өзү тартканын жазууда.

Анда жазылгандай, жүргүнчү аял таксист аны күткөндүгү үчүн 57 рубль кошумча төлөшү керек болгон. Рустам аттуу таксист окуя тууралуу журналисттердин суроосуна жооп берип жатып, аял аны күтүп туруусун суранганын, ал таксиде жүргүнчүсүн 8 мүнөт күткөнүн айткан.

"Жүргүнчү аял кошумча 57 рублды төлөөдөн баш тартып, таксист экөөнүн ортосунда чыр чыккан. Бул акчаны төлөбөйм дегенден кийин таксист аны айткан дарегине жеткирбей турганын айткан. Буга аялдын ачуусу келип, туталанып, ызасы күчөп чатак сала баштаган", - деп жазылат маалыматтарда.

Андан кийин аял таксистке кемсинткен сөздөрдү айтып, жемелеп ал тургай бир канча жолу кол көтөргөн. Таксист журналисттерге жүргүнчү аялдын бул жоругун кечиргенин, бул буюртма тууралуу такыр унуткусу келгенин айткан.

Ал эми жүргүнчү аял фитнес клубда машыктыруучу болуп иштери жазылат маалыматтарда. Бул видео тарап кеткенден кийин жумуштан кетүүнү чечкен. Бирок жетекчилиги жана кесиптештери анын бул оюн кубатташкан эмес.

"Яна жумушта эч качан мындай болуп чыр салган эмес. Анын жумушуна биз да, келген кардарлар да ыраазы", - дешкен алар. Психолог болсо жүргүнчүнүн мындай мамилесин "психопатия" деп атаган.

Аймактар аралык "Таксист" профсоюзунун эксперти кардарды күтүү үчүн кошумча төлөм алуу - бул таксисттин эмес, аны ишке ашырган системдин куулугу деп айткан. Буга таксисттин эч кандай тиешеси жок, иштеп жаткан систем ошондой деген ал. Мындан тышкары, жүргүнчүнүн кылыгын чектен ашкан деп сыпаттап, мындай учурда таксист жүргүнчүнү унаадан түшүрүп жибериши керек деген.

"Бирок кайсы бир жагдайлар боюнча компанияга кардардан даттануулар келип түшсө, компания кайра эле таксистке айып салат. Буюртма учурундагы бир дагы мындай окуялар үчүн компания жоопкерчилик албай жатат, ал эми жүргүнчү менен таксисттин ортосундагы ушул сыяктуу көрүнүштөр көп да", - деген эксперт.