Супер-Инфо
super.kg видео
"Акыркы күндөрү Ооганстандагы "Талибан" радикал тобу менен тынчтык сүйлөшүүлөрүнүн жүрүшүндө АКШ "кыйла ийгиликке жетишкенин" бейшемби күнү мамлекеттик катчы Майк Помпео да билдирген. Ал Дональд Трамп 2001-жылдан бери уланып келаткан жаңжалды тынчтык жолу менен токтотууну көздөгөн сүйлөшүүлөрдү улантып жатканын айткан.
13-февралда "Талибан" Ооганстандагы зордук-зомбулукту жети күнгө токтото турууну көздөгөн сунуш боюнча сүйлөшүү өткөрүшкөнү белгилүү болгон.
"Талибандын" өкүлү жума күндөн тарта согуштук операциялардын санын азайтууну баштай тургандыгын ырастап, бирок ок атууну толук токтотуу тууралуу кеп жок экенин билдирген.
"Талибандын" күчтөрү Ооганстандагы аймактардын бир бөлүгүн көзөмөлдөйт. Акыркы мезгилдерде алар өзүлөрү да "Ислам мамлекети" террордук тобунун кол салуусуна кабылган учурлар катталууда. Трамп тынчтык келишимине жетишүү датасын так айткан жок, бирок ал айдын аягына чейин белгилүү болушу керектигин белгиледи", - деп айтылат маалыматта.
Маалым болгондой, "Талибан" кыймылы1996-жылдан 2001-жылга чейин Ооганстандын аймагын толугу менен көзөмөлдөгөн. 11-сентябрдагы теракттардан соң алар АКШга Усама Бен Ладенди өткөрүп берүүдөн баш тарткандан кийин Кошмо Штаттар менен коалиция биргеликте Ооганстандын өкмөтүнө Кабулду жана бир нече аймакты алууга жардам берген.
