Ошто мектеп толугу менен күйүп кетти. Түндө чыккан өрт эртең менен өчүрүлдү

Ош облусунун Кара-Кулжа районуна караштуу Коо-Чаты айылындагы орто мектепте өрт чыгып, билим берүү жайы толугу менен күйүп кетти. Өрт 17-февралда саат 23:50 чамасында Сагындык атындагы орто мектептен чыккан. Өрттү өчүрүү 18-февралда эртең менен мүмкүн болгонун ӨКМнын маалымат кызматынан кабарлайт.

"Өрттүн кесепетинен аянты болжол менен 500 чарчы метр мектеп толугу менен күйдү. Каза болгон жана жабыркаган адамдар жок. Өрттүн себеби такталууда.

Өрттү өчүрүүгө 1 бөлүм жана авариялык куткаруу унаасы менен 10 куткаруучу тартылган. Жолдун татаалдыгына байланыштуу жана аралык 122 чакырым болгондуктан, куткаруучулар 18-февралда саат 07:40та айтылган дарекке жетишкен. Тартылган күчтөрдүн жардамы менен өрт саат 07:45те чектөөгө алынып, саат 07:55те толук өчүрүлгөн", - дейт мекеменин маалымат катчысы.