Ооруканада каза болгон 19 жаштагы келиндин окуясы. Саламаттыкты сактоо министрлиги маркум эмнеден улам көз жумганын айтты

3 ай мурда эгиз төрөгөн 19 жаштагы келин Бишкектеги Улуттук госпиталда каза болгондугу маалымдалган. Саламаттыкты сактоо министрлиги маркум эмнеден улам каза болгонун айтат.

"19 жаштагы Ж.Э. Ысык-Көл облустук биргелешкен ооруканасынын жандандыруу бөлүмүнөн Улуттук госпиталга 6-февралда которулган. Төрөттөн кийин анын бөйрөктөрү курч жабыркаганынан улам 25 суткага ооруканага келип түшкөн. Дарыгерлер тарабынан тиешелүү болгон дарылоо иштери жүргүзүлүп, консилиум түзүлгөн.

Бардык медициналык дарылоолорго карабай бейтаптын абалы оор бойдон кала берген. Келин 17-февралда көз жумду. Соттук-медициналык экспертиза жүргүзүлдү, жыйынтыгы 2 ай аралыгында белгилүү болот", - деп билдирет мекеменин басма сөз катчысы.

Окуя тууралуу Биринчи Май РИИБинин маалымат кызматы бүгүн, 18-февралда билдирген. Бул факты Кылмыштардын жана жоруктардын бирдиктүү реестрине 152-берене (медициналык же фармацевттик кызматкер тарабынан кесиптик милдеттерди аткаруу талаптагыдай эмес) менен катталып, сотко чейинки өндүрүш иши ачылды.