Жалал-Абадда 30 миң доллар жасалма акчаны сатууга аракет кылган топ кармалды

Жалал-Абадда 30 миң доллар жасалма акчаны сатууга аракет кылгандар кармалды. Кармалгандардын экөө диний уюмдун мүчөсү экенин УКМКнын маалымат кызматынан кабарлашты.

"16-февралда жасалма акчаны сатуу учурунда 3 киши кармалган. Алар 1986-жылы туулган Х.М., диний уюмдун мүчөлөрү 1982-жылы туулган К.Н. жана 1971-жылы туулган К.Б. экени аныкталды. Кармалгандардын үчөө тең Кыргыз жарандары.

Тергөөнүн жүрүшүндө жасалма акчалар коңшу өлкөлөрдүн биринен мыйзамсыз алып келингени маалым болду. Жасалма каражаттар атайын схема менен, тагыраагы, 10 миң доллар жасалма акчаны 4 миң 500 доллар чыныгы акчага алмаштырмакчы болушкан.

Бул факт Кылмыштардын жана жоруктардын бирдиктүү реестрине 225-берене (акчаны же баалуу кагазды жасалма жол менен жасоо) менен катталып, сотко чейинки өндүрүшкө алынды.

Жалал-Абад шаардык соту кармалгандарды СИЗОго киргизди. Учурда тергөө иш-чаралары улантылып, жасалма каражаттарды даярдоого жана сатууга катыштыгы бар адамдарды аныктоо иштери жүргүзүлүп жатат", - дешти маалымат кызматынан.