Алай районунун Арпа-Тектир айылынын жашоочулары Төлөгөн Рахманберди уулу күнөөсүн моюнга алганын айтышты

Буга чейин Ички иштер министри Кашкар Жунушалиев Алай районунун Арпа-Тектир айылынын жашоочулары менен жолуккан. Анда айыл аксакалдары президентке кайрылышып, "инибиз Рахманберди уулу Төлөгөнгө Ошто Кылычбек Саркарбаев, Нурбек Раимбеков, Мунар Сайпидинов тарабынан коркутуу-үркүтүү болуп жатат. Ушул ишти өз көзөмөлүңүзгө алууңузду сурайбыз. Аксакалдарды кабыл алып, көйгөйлөрүн угуп, ушул жигитибиздин ишин жакшы териштирип берсеңиз", - деп суранышкан.

Ал эми бүгүн, 20-февралда аталган айылдын жашоочулары Төлөгөн Рахманберди уулу күнөөсүн моюнга алганын айтып, жалпы элден кечирим сураган видеосу тарады.

"Төлөгөн Рахманберди уулу кылган иштерин моюнга алып, ал элди тынчсыздандырууга чакырды. Биз деле тынчпыз. Президентке рахмат. Ушул жерге министр өзү келип, эл менен жолугушуп, элге түшүндүрүп кетти. Эл ыраазы!" - деди аксакал.

"Урматтуу Сооронбай Жээнбеков, биздин кайрылууну угуп, кайра ага жооп кайтарганыңызга рахмат. Министр өзү келип, жолугуп кетти. Бул жерде Матраимовдордун тиешеси деле жок экен. Биз түшүнбөстүктөрдөн улам айткан сөз экен. Элдин атынан кечирим сурайбыз. Биз ал жерде түшүнбөй сүйлөп койгон экенбиз", - деп айтылганын видеодон көрүүгө болот.