ЖЭБ соту: Отурумга аскердик прокурор катышууда

Бүгүн, 24-февралда Бишкек шаардык сотунда ЖЭБ иши боюнча соттук отурум уланууда.

Анда иштин материалдарын иликтөө процесси жүрүүдө. Судья Ирина Воронцова жактоочулардын жана айыпталуучулардын суранычы менен иштин 12-томундагы материалдарды окууда. Жалпысынан ЖЭБ иши боюнча 55 том бар.

Соттук процесске мамлекеттик айыптоочулардан тышкары, аскердик прокурор дагы катышып жатат.

Буга чейин 2019-жылдын 6-декабрында Бишкектин Свердлов райондук соту коррупция боюнча айыпталып жаткандарга карата чечим чыгарган. Анда мурдагы өкмөт башчы Сапар Исаков менен "Улуттук энергетикалык холдинг" ишканасынын мурдагы башчысы Айбек Калиев "коррупция" беренеси менен күнөөлүү деп табылып, 15 жылга эркинен ажыратылган. Мурдагы өкмөт башчы Жантөрө Сатыбалдиев 7 жыл 6 айга соттолсо, депутат Осмонбек Артыкбаев менен мурунку финансы министри Ольга Лаврова айып пул төлөөгө милдеттендирилген. "Электр станциялары" ишканасынын башчысынын мурдагы орун басары Жолдошбек Назаров жана Бишкек жылуулук электр борборун модернизациялоону башкаруу боюнча топтун мурдагы аткаруучу директору Темирлан Бримкуловдун жаза мөөнөтү өткөндүгүнө байланыштуу сот залынан бошотулушкан. Ал эми "Электр станциялары" ишканасынын мурдагы башчысы Салайдин Авазов "коррупция" беренеси менен күнөөлүү деп табылып, 11 жыл 3 айга эркинен ажыратылган. Соттун өкүмүнө макул болбогон жактоочулар шаардык сотко апелляциялык даттануу жөнөткөн.