ЖЭБ соту: Отурумда ЖЭБ боюнча келишимде кытай тарап бардык салыктардан бошотулганы окулду

Бүгүн, 24-февралда Бишкек шаардык сотунда ЖЭБ иши боюнча соттук отурум уланууда. Анда иштин материалдарын иликтөө процесси жүрүүдө. Судья Ирина Воронцова жактоочулардын жана айыпталуучулардын суранычы менен иштин 13-томундагы материалдарды окууда. Анда мурдагы энергетика министри Осмонбек Артыкбаевдин жактоочусу Садыков, судьяны иштин материалында жазылган ЖЭБ боюнча түзүлгөн келишимдин айрым пунктарына көңүлүн бурдурду. Ага ылайык, насыя берип жаткан кытай тарап Кыргыз өлкөсүндө бардык салыктардан, бажы төлөмдөрдөн бошотулганы жазылган. Мындан тышкары келишим боюнча, эгер тараптар ортосунда макулдашууга келе албаган жагдайлар жаралса, анда алардын иши Эл аралык арбитраждык сотто каралат деп жазылган.

"Өлкөнүн Тышкы иштер министрлиги келишимдин ошол пунктары мамлекеттин эгемендүүлүгүнө кол салуу болот деп белгилеген. Бирок парламент бул келишимди колдоп, ратификациядан өткөргөн", - дейт жактоочу.

Жалпысынан ЖЭБ иши боюнча 55 том бар. Учурда иштин 14-тому иликтенип жатат.