Азия чемпиону Арсалан Будажапов: "Кыргыз өлкөсүнүн атынан мелдешке катышып чемпион болгонума сыймыктанам"

Индиянын Нью-Дели шаарында өткөн күрөш боюнча Азия чемпиондугуна катышкан балбандар бүгүн, 24-февралда мекенибизге кайтып келди. Эркин күрөш боюнча 79 килограммга чейинкилер арасында Азия чемпиону болгон Арсалан Будажапов олимпиадага жолдомо утаарына ишенээрин, жеңиши кыргыз элине арналарын айтты.

"Бул Азия чемпиондугунда эң күчтүү атаандашым финалда күрөшкөн индус балбаны болду. Мен жеңишимди бүткүл кыргыз элине жана таенеме арнайм. Ал киши Кыргыз Республикасынын Эмгек сиңирген дарыгери. Менин апам кыргыз, атам болсо бурят улутунан. Мен апамдын өлкөсүнүн атынан эл аралык мелдешке катышып жатканыма сыймыктанам. Бишкекте өтчү олимпиада оюндарына тандап алуу турнирине мындан дагы жакшы даярданып, лицензия утканга болгон күчүмдү жумшайм. Баарыңыздарга колдоп келгениңиздер үчүн ыраазычылыгымды билдирем", - деди ал.

Арсалан Будажапов 79 килограммга чейинкилер арасында Азия чемпиондугунда эркин күрөш боюнча алтын байгеге ээ болгон.