Коронавирус Өзбекстандын рыногуна залакасын тийгизди. Ташкентте товарлар кымбаттап кетти

Коронавируска байланыштуу Өзбекстандын Ташкент шаарында ири дүң соода базарларында товарлар кымбаттоодо. Бул тууралуу өзбек басылмалары жазып чыгышты.

Кыргыз өлкөсү коронавируска байланыштуу Кытай менен чек арасын жаап салганына байланыштуу Ташкенттеги ири дүң соода базарларында товарлар 5 пайызга кымбаттап баштады. Анткени Ташкенттеги ири деп эсептелген "Урикзор" дүң соода базарына Кытайдан келген товарлардын 60 пайызы Кыргыз өлкөсү жана Казакстандын чек аралары аркылуу өтүп келген.

"Товарларымды 5 пайызга кымбаттатууга туура келди. Чек ара жабылып, Кытайдан товарлар дүң келбей калганына байланыштуу бардык соодагерлер товар ташыгычтардан көз каранды болуп калдык. Алар болсо бааларды кымбаттатып салышты", - деген базардагы соодагер. Андан сырткары базарларда курулуш товарлары да 25-30 пайызга кымбаттаганы айтылууда.