Террордук акт болот деген Инстаграмдагы билдирүүсү үчүн 17 жаштагы өспүрүм кармалды

24-февралда Инстаграм тармагынын _roma7unuzow аттуу колдонуучусу “Шаардык универсалдык дүкөндө саат 17:30да террордук актысы болот. Жанкечти даяр, анын ата-энесине 2 миллион доллар төлөндү” деген комментарий калтырган. Билдирүү калтырган жаран кармалганын УКМКнын маалымат кызматынан кабарлашты.

"Аталган факты 239-берененин 1-бөлүгү (Терроризм актысы, башкача айтканда, адамдарга өлүм коркунучун жаратуу) менен Кылмыштардын жана жоруктардын бирдиктүү реестрине катталды.

Ыкчам тергөө иштеринин жүрүшүндө билдирүү калтырган автор Чүй облусунун 2002-жылы туулган Юнузов Р. экендиги аныкталды. Сотко чейинки өндүрүштүн алкагында Юнузов Р. кармалып, УКМКнын Башкы тергөө башкармалыгына алып келинген. Сурак учурунда ал жасаган ишине өкүнүп, бейбаштыктан улам жазгандыгын билдирди.

Ал эми террордук акт тууралуу маалымат тастыкталган жок. Учурда тергөө амалдары уланууда", - деп билдирди маалымат катчы.

УКМК эскертет! Бейбаштыктан улам, өзүнүн иш аракеттеринин олуттуулугун сезбестен, террордук акты тууралуу билип туруп жалган маалымат таратуу менен коомдо коркунуч туудуруп, өлкөнүн тургундары жана меймандарына ыңгайсыздык жаралып, бир кыйла күч, каражаттар жана убакытка чыгым кылууда.

Аны менен катар мекемелердин жана транспорттун иштөө убактысы бузулууда. Мындан тышкары мындай жалган билдирүүлөрдү текшерүүдө укук коргоо органдарын реалдуу террордук акт коркунучунан алаксытуу ыктымалдыгы бар. Мындай иш аракеттер кылмыш катары саналат.

Кылмыш-жаза кодексинин 239-беренесине ылайык террордук акт жасоо коркунучун келтирген тарап 7 жылдан 10 жылга чейин эркинен ажыратылат.