Күрөш боюнча Азия чемпиондугунда көзүнөн жаракат алып калган Улукбек Жолдошбеков мамлекеттин эсебинен дарыланат

Индиянын Нью-Дели шаарында өткөн Азия чемпиондугунда чемпион болуп, бирок көзүнөн жаракат алып калган кыргыз балбаны Улукбек Жолдошбеков мамлекеттин эсебинен дарыланат. Бул тууралуу SUPER.KG порталына Жаштар иштери, дене тарбия жана спорт боюнча мамлекеттик агенттигинен билдиришти.

"Спорттун олимпиадалык түрлөрү боюнча дирекциясынын жобосуна ылайык, Кыргыз Республикасынын курама командасына кирген спортчу аталган дирекциянын эсебинен медициналык тейлөөдөн өтөт. Толук кандуу дарылануу Жаштар иштери, дене тарбия жана спорт боюнча мамлекеттик агенттиги тарабынан көзөмөлгө алынат", - деп билдиришти.

Улукбек Жолдошбеков Азия чемпиондугунда эркин күрөш боюнча 61 килограмм салмакка чейинкилер арасында алтын байгеге ээ болгон. Ал беттеш учурунда атаандашы көзүн чукуп алганын, көзүнүн көрүүсү начар болуп жатканын айткан.