Кыргыз өлкөсүнө кирүүдөн мурда карантинге алынат. Дагы 4 мамлекеттин жарандарына карата чектөө киргизилди

Кыргыз өлкөсү коронавирустан коргонуу үчүн Иран, Түштүк Корея, Япония жана Италиянын жарандарына карата чектөө киргизди. Эми аталган өлкөнүн жарандары республиканын аймагына кирүүдөн мурда 14 күнгө карантинге алынат. Маалыматты Саламаттыкты сактоо министрлигинин оперативдүү штабынан билдиришти.

"Япониядан, Түштүк Кореядан, Ирандан, Италиядан (бул тизме эпидемиологиялык абалга жараша толукталмакчы) келген жарандарды карантинге алуу 21-февралдан баштап ишке киргизилди. Аталган мамлекеттин жарандары карантинден өткөндөн кийин гана республиканын аймагында эркин жүрө алышат. Ал эми Кытайдан келгендерге мындай чектөө мурда эле киргизилген", - деди мекеменин маалымат кызматынан.

Бүгүнкү күндө коронавирус менен жабыркагандар жок. 534 адам стационардык көзөмөлдө туруп, алардын 391и жашаган аймагы боюнча медициналык жайдан текшерүүдөн өтүп жатышат. Кыргыз өлкөсүнүн бардык көзөмөл-өткөрүү жайлары күчөтүлгөн тартипте иштеп жатканын вице-премьер-министр Алтынай Өмүрбекова 24-февралда билдирген.