Жактоочу Сапар Исаков тамакка ууланганын жазып чыкты

Мурдагы өкмөт башчы Сапар Исаков тамакка ууланды. Бул тууралуу жактоочу Замир Жоошев социалдык тармактагы баракчасында жазган.

"Мурда белгиленген ЖЭБ иши боюнча отурум Сапар Исаков жоктугуна байланыштуу болбой калды. Өз кезегинде Сапар Исаков кечээ тамакка ууланып калгандыктан, соттук процесске келе албай калган. Отурумда конвойлор тергөө абагындагы дарыгерлердин медициналык текшерүүлөрүнө таянып Исаковдун ден соолугунун начарлаганын тастыкташты. Жакынкы арада Сапар Исаков калыбына келип, биринчи күнү соттук процесс уланат деп үмүттөнөм", - деген жактоочу билдирүүсүндө.

Буга чейин Жоошев SUPER.KG порталына "Сапар Исаковдун кан басымы 140/90 болуп көтөрүлүп кетиптир. Мындан тышкары башы тегеренип, жүрөгү айланып, өзүн жаман сезип жатканын айтты. Дене табы дагы көтөрүлүптүр. Учурда анын ден соолугун тергөө абагындагы дарыгерлер көзөмөлдөп жатышат", - деп билдирген.

Ал эми УКМК Сапар Исаковдун абалы турукташып калганын билдирген.

"Учурда Исаковдун ден соолугу турукташып, канааттандырарлык болуп калды. Эртең менен ал ооруксунуп жаткан. Дарыгерлер Исаковдун ден соолугун көзөмөлдөп жатышат", - деген мекеменин басма сөз катчысы.