Дарыядан аккан жашыл суу. ӨКМ дарыянын суусунан анализ алынганын жана жыйынтыгы жакында чыгарын билдирди

Социалдык тармактарга тараган Aламүдүн дарыясынын булганышы жөнүндө видео боюнча текшерүү иштери жүрүүдө. Бул тууралуу Өзгөчө кырдаалдар министрлигинин басма сөз кызматынан билдиришти.

"Чүй облустук жарандарды коргоо комиссиясынын курамындагы Ысык-Ата жана Аламүдүн райондорундагы мамлекеттик экологиялык техникалык инспекциянын башкармалыгынын өкүлдөрүнүн, Чүй облустук Өзгөчө кырдаалдар министрлигинин башкармалыгы, Чүй-Бишкек токой чарбасынын жана айлана чөйрөнү коргоо мамлекеттик агенттигинин өкүлдөрү дарыянын айланасына текшерүү жүргүздү. Суудан анализ алынды. Башкача жыттанган жыт, жакын жерде балык же канаттуулардын өлгөндүгү аныкталган жок. Дарыянын агымы боюнча текшерүү жүрүүдө. Анализдин жыйынтыгынан толук чечим чыгат", - деп жазылат маалыматта.

Буга чейин социалдык тармактарга "Аламүдүн дарыясында жашыл түстөгү суу агып жатат" деген аталышта видео тараган.