Кыргыз өлкөсүнүн аймагына тажик чек арачылары кирип кеткен. Учурда абал туруктуу

29-февраль күнү Кыргыз өлкөсүнүн аймагына тажик чек арачылары кирип кеткендиги аныкталган. Бул тууралуу Мамлекеттик чек ара кызматынын басма сөз кызматынан билдиришти.

"29-февраль күнү Лейлек чек ара отрядынын чек арачыларына жергиликтүү тургундан саат 17:30 чамасында Сай жерлигинде Кыргыз Республикасынын аймагына 30-40 метр кирип кеткен Тажик Республикасынын куралсыз чек арачылар байкалгандыгы тууралуу маалымат келип түшкөн. Аталган жерге застава башчысы келип, тажик чек арачылары жергиликтүү тургунду - Кыргыз өлкөсүнүн жаранын көрүп, кайра Тажикстандын аймагына кайтканын аныктаган. Бул факты боюнча Кыргыз Республикасы менен Тажик Республикасынын чек ара өкүлдөрүнүн жолугушуусу болуп, анда кыргыз тарап тажик өкүлүнөн Кыргыз өлкөсүнүн аймагында Тажикстандын аскер кызматкерлеринин мыйзамсыз жүрүүсү боюнча түшүндүрмө талап кылган. Тажикстандын чек ара өкүлү тажик чек арачыларынын мамлекеттик чек арадан адашып калгандыгын, бул аймакта инженердик тосмолор болбогондугун айтып, аталган факты боюнча териштирүү иштерин жүргүзө тургандыгын убада кылды", - деп жазылат маалыматта.