Митингден кийин 166 жаран кармалып, 4 адам камакка алынды

"Ала-Тоо" аянтындагы митингге катышкандардын ичинен 166 адам кармалды. Бул тууралуу бүгүн, 3-мартта ИИМдин басма сөз кызматынан билдиришти.

"2-марттагы митингден улам массалык баш аламандыктарга жол берген 166 жаран Бишкек шаардык милиция кызматтарынын бөлүмдөрүнө жеткирилди. Алардын 162си менен тактоо, аныктоо иш-чаралары жүргүзүлгөн соң коё берилди.

Бул факт Бишкек ШИИББинин Кылмыштардын жана жоруктардын бирдиктүү реестрине 264-беренесинин (массалык баш аламандыктар) негизинде катталып, сотко чейинки өндүрүш иши башталды. Аталган иштин алкагында 4 жаран камакка алынды. Учурда тиешелүү экспертизалар дайындалып, ыкчам иликтөө иш-чаралары уланууда", - деди маалымат катчы.

Мындан тышкары митингде 24 милиция кызматкери денесинен ар кандай жаракаттарды алышты деп кошумчалады мекемеден.

Кечээ, 2-мартта саат 19:00гө карата "Ала-Тоо" аянтындагы абактагы саясатчы Садыр Жапаровду колдоп митингге келген катышуучуларына күч түзүмдөрүнүн кызматкерлери суу аткыч машиналарды, көздөн жаш агызуучу каражаттарды колдонуп, аянттан сүрүп чыгаруу үчүн кууп тараткан.