Министрлик: "Митингден кийин 22 адам ооруканага кайрылып, бир бейтап дарылануусун улантууда"

Бишкектин "Ала-Тоо" аянтында орун алган митинг учурунда жабыркагандар болду. Саламаттыкты сактоо министрлигинин маалыматына ылайык, Бишкектеги медициналык жайларга жалпысынан 22 адам кайрылган.

"2-мартта борбор калаадагы медициналык жайларга 22 адам кайрылган. Алардын 19у күч түзүмдөрүнүн кызматкерлери экени аныкталды. Кайрылгандардын 21и биринчи медициналык жардам алгандан кийин амбулатордук дарыланууга жөнөтүлдү.

1 милиция кызматкеринин баш мээси чайкалып, моюн омурткасы чоюлуп Улуттук госпиталга жеткирилген. Учурда анын абалы канааттандырарлык", - дейт министрликтин маалымат катчысы.

Ал эми Ички иштер министрлиги митинг учурунда 24 милиция кызматкери денесинен ар кандай жаракаттарды алганын бүгүн, 3-мартта кабарлады.

Кечээ, 2-мартта саат 19:00гө карата "Ала-Тоо" аянтындагы абактагы саясатчы Садыр Жапаровду колдоп митингге келген катышуучуларына күч түзүмдөрүнүн кызматкерлери суу аткыч машиналарды, көздөн жаш агызуучу каражаттарды колдонуп, аянттан сүрүп чыгаруу үчүн кууп тараткан.