Тажикстан коронавируска байланыштуу 35 мамлекеттен келген жарандарды өлкө аймагына киргизбөө чечимин кабыл алды

Тажикстандын бийлиги 60ка чукул мамлекетте катталган корнавируска байланыштуу дүйнөнүн 35 өлкөсүнөн келген жарандарды республиканын аймагына киргизбөө чечимин кабыл алды.

Бул тууралуу Тажикстандын жарандык авиация агенттигинин жетекчисинин орун басары Азиз Набизода жалпыга маалымдоо каражаттарына билдирди.

Анын айтымында, бул иштердин баары калктын саламаттыгы жана коронавирустун алдын алуу үчүн жасалып жатат.

"35 өлкөнүн жарандарын авиакомпаниялар бортко кабыл албашы керек жана бул билдирүүнүн нускамасы менен туристтик компаниялар кабардар болду" деп ал журналисттерге маалымат берип жатып билдирген.

Тажикстанга кире албай турган мамлекеттердин катарына – Кытай Эл Республикасы, Япония, Түштүк Корея, Вьетнам, Сингапур, Австралия, Малайзия, Камбожа, Филиппин, Таиланд, Непал, Шри-Ланка, Индия, Финляндия, Италия, Улуу Британия, Испания, Швеция, Бельгия, Израиль, Австрия, Хорватия, Швейцария, АКШ, Канада, Бириккен Араб Эмираттары, Египет, Иран, Ливан, Кувейт, Бахрейн, Оман, Ооганстан, Ирак жана Алжир өлкөлөрү кирет.