“Мамлекеттик желек Айкөл Манастын туусуна окшош. Өлкөбүздүн бардык жарандарын бириктирет”. Борбордук аянтта мамлекеттик туу күнү белгиленди

Бүгүн, 3-мартта Борбордук "Ала-Тоо" аянтында мамлекеттик туу күнүнө арналган салтанат болуп өттү. Бул тууралуу шаардык мэриядан билдиришти.

Иш-чарага шаар мэри Азиз Суракматов, шаардык кеңештин төрагасы Жаныбек Абиров жана башка түзүмдүн жетекчилери менен бирге мэриянын кызматкерлери катышканы айтылат.

“Кыргыз өлкөсүнүн мамлекеттик символу болгон туунун 28-жылдыгына карата мэр Азиз Суракматов сөз сүйлөп жатып “Мамлекеттик желек Айкөл Манастын туусуна окшош. Өлкөбүздүн бардык жарандарын бириктирет” деген оюн баса белгилеп өттү. Иш-чаранын соңунда Кыргыз өлкөсүнүн гимни ырдалып, мамлекеттик туу желбиреди”, - деп айтылат маалыматта.

Мамлекеттик Туу Кыргыз өлкөсүнүн Жогорку Советинин 1992-жылдын 3-мартындагы токтому менен бекитилген. Анын авторлору: Эдил Айдарбеков, Бекбосун Жайчыбеков, Сабыр Иптаров, Жусуп Матаев, Маматбек Сыдыков.

Кыргыз Республикасынын Мамлекеттик туусу ортосуна кырк нуру тегиз чачыраган алтын түстөгү күн алкагынын ичине кыргыз боз үйүнүн кызыл түстөгү түндүгүнүн сүрөтү түшүрүлгөн тик бурчтуу кызыл кездемеден жасалган. Туунун эни анын узундугунун бештен үчүн түзөт. Күндүн жана нурлуу алкак диаметрлеринин катышы бештен үчкө барабар. Түндүктүн диаметри нурлуу алкактын диаметринин жарымына барабар.