Коронавирус боюнча республикалык штаб социалдык тармактарда тараган маалыматтар тууралуу билдирүү жасады

Коронавирус инфекциясынын өлкө аймагына кирүүсүнө жана жайылышына жол бербөө боюнча республикалык штаб социалдык тармактарда тараган маалыматтарга карата билдирүү жасады. Бул тууралуу өкмөттүн басма сөз кызматынан билдиришти.

"Такталган фактыларсыз коронавирус чыккандыгы тууралуу билдирүү жасоо айрым жарандардын жоопкерчиликсиздигин күбөлөндүрөт. Өкмөт бардык зарыл чараларды көрүүдө, бүгүнкү күнү республикада коронавируска кабылгандар жок.

Айрым жарандарды өлкөдө коронавирус бар экендиги тууралуу жоопкерчиликсиз билдирүүлөр менен элдин тынчын албоого чакырабыз. Мындай имиштерди жайылтуу дүрбөлөңгө түшүрүп, ишканалардын, коомдук транспорттун ишине тоскоолдук жаратат. Бардык жарандарга кандайдыр бир суроолор келип чыккан шартта Саламаттыкты сактоо министрлигине кайрылууну сунуштайбыз.

Медициналык кызматкерлер, чек арачылар жана башка кызматтардын кызматкерлери ар бирибиздин коопсуздугубузду камсыздоо үчүн тийиштүү чараларды көрүп жатышат.

Биз бардык жарандарды жоопкерчиликтүү мамиле жасап, социалдык тармактарда жана мессенджерлерде чындыкка дал келбеген маалыматтарды жайылтпоого жана мамлекеттик органдардын расмий билдирүүлөрүнө гана ишенүүгө чакырабыз", - деп жазылат маалыматта.