Францияда футболчуларга оюндун аягына чейин кол кармашып саламдашканга тыюу салынды

Коронавирустун айынан Франциянын Жогорку Лигасында (Лига 1) ойногон командаларга оюндун аягына чейин футболчулар бири-бири менен кол кармашып саламдашканга тыюу салынды. Мындай чечимди Франциянын профессионалдык футбол лигасынын президенти Натали Буа де ля Тур кабыл алган. Бул тууралуу ал франциялык басылмалардын бирине берген маегинде айткан.

"Бизге коронавирусту алдын алуу үчүн Саламаттыкты сактоо министрлиги тарабынан ушундай сунуш түштү. Биз мындай чечимди колдоп, башкаларга үлгү көрсөтүшүбүз керек. Футболчуларга кол кармашып учурашканга тыюу салынат", - деп билдирген ал.

Маалыматка ылайык, Франция Европа өлкөлөрүнүн ичинен коронавирусту жуктургандар боюнча Италиядан кийин экинчи орунда турат. Акыркы маалыматтар боюнча, бул өлкөдө коронавирус менен жабыркагандар 204 адам болсо, 4 адам каза болгон.