Ханыша Елизавета II биринчи жолу сыйлыктарды кол кап кийип тапшырды. Ханышанын бул кадамы коронавирустан коргонуу катары бааланууда

3-мартта Букингем хан сарайында көптөн күткөн салтанаттуу сыйлык тапшыруу аземи өттү. Анда ардактуу титулдар жана ордендер сыйлык ээлерине тапшырылды. Аталган иш-чара Улуу Британияда 1952-жылдан бери салттуу өткөрүлүп келет. Бул аземге Елизавета II биринчи жолу колуна кол кап кийип катышты. 93 жаштагы ханышанын бул кадамын жалпыга маалымдоо каражаттары дүйнөнү дүрбөлөңгө салып жаткан коронавирустан өзүн коргоо катары баалашууда. Бул тууралуу чет элдик маалымат булактары жазып чыгышты.

"Улуу Британиянын өкмөтү ханышага вирус кантип, кайдан жана кандай жолдор менен жайылганын, вирустун очогу кайдан чыкканын түшүндүрүп, айтып берген. Анда вирустун таралуу жолдору, эл көп жыйылган жерден алыс болуу, эрежелерди так жана туура сактоо нормалары дагы айтылган.

1952-жылдан бери ханыша Елизавета II 388 миңден кем эмес орден жана ардактуу чиндерди ээлерине тапшырып, 540тан ашуун аземди өткөргөн. Бул учурда ханыша ар бир сыйлык ээсине сыйлыгын колун кысып, жагымдуу жылмаюу менен тапшырат. Анда ханыша сөзсүз түрдө адамдардын көп массасы менен байланышта болот.

Букингем сарайында өтүүчү иш-чарага чейин, өкмөт башчы Мэтт Хэнкок вируска байланыштуу жаңы учурлар боюнча ханышага билдирип өткөн", - деп айтылат маалымат каражаттарында.

Салтанаттуу иш-чарага Кейт Миддлтон менен ханзаада Уильям катышкан. Бирок алар кол кабы жок келишкен. Алар чын жүрөктөн сыйлык ээлерин наамдары менен куттуктап, колун кыскан. Маалымат булактарынын жазганына таянсак, анда Елизавета II Кейт жана Уильямды вируска олуттуу карабаганына нааразы болгон.

Маалыматка ылайык, учурда Улуу Британияда коронавируска байланыштуу 51 учур катталган. Буга байланыштуу өлкө аймагында вирустун алдын алуу иштери кызуу жүрүүдө.