Мамкаттоо: "Өлкөдө жалпы жарандык паспортту алууну каалагандардын саны өстү"

Мамлекеттик каттоо кызматына жалпы жарандык паспортторду берүүнү тездетүү тапшырмасы берилди. Мындай билдирүү коронавирус инфекциясынын өлкө аймагына кирүүсүнө жана жайылышына жол бербөө боюнча республикалык штабдын кезектеги жыйынында айтылды.

Мамлекеттик каттоо кызматынан учурда жалпы жарандык паспортту алуучулар көбөйгөнүн билдирет.

"Өлкөгө ID-карта менен кирүүгө тыюу салынгандан кийин жалпы жарандык паспортту алуу үчүн кайрылгандардын саны өстү. Буга байланыштуу жалпы жарандык паспортту алуучуларга жана чет өлкөгө чыга тургандарга кыска маалымат бере кетели.

Жалпы жарандык паспорт үчүн керектүү документтер:

ID-карта;

Арыз;

Үй-бүлөлүү болсоңуз нике тууралуу күбөлүк;

Бардык балдарга (жаңы төрөлгөн ымыркай болобу, өспүрүм болобу) паспорт алуу шарт. 2019-жылдан баштап киргизилген эреже.

Жалпы жарандык паспортторду ыкчам алуунун (каражат төлөп) мөөнөттөрү - 3 саат, 2 күн, 4 күн жана 7 күн. Ал эми кошумча акча төлөбөй алуунун мөөнөтү 12 иш күнү деп эсептелет. Паспорт алуу үчүн жашаган жериңизден маалым кат керектелбейт", - дейт мекеменин басма сөз катчысы.