Муфтият: "Жума намазга келген адамдардын санына чектөө коюлбайт"

Коронавирусту алдын алуу үчүн Кыргыз өлкөсүндө намазга массалык түрдө топтолуу чектелерин 28-февралда саламаттыкты сактоо министри Космосбек Чолпонбаев билдирген.

Бул боюнча бүгүн, 6-мартта Мусулмандар дин башкармалыгына кайрылганыбызда жума намаз белгиленген убакытта окуларын жана адамдардын санына чектөө киргизилбегенин билдиришти.

"Муфтият Саламаттыкты сактоо министрлигинин кайрылуусуна ылайык, коронавирустун алдын алуу алкагында өлкө аймагындагы казыят, хатибият, мечит, медресе жана окуу борборлору менен биргеликте жума намаздарында, сабактарда ошондой эле жыйындарда коронавирустун алдын алуу жолдорун элге түшүндүрүү боюнча тапшырмаларды берди. Муну менен катар муфтият республикадагы бардык мечиттерди жана жайнамаздарды таза кармоону сунуштады", - деп айтылат маалыматта.

Ошондой эле муфтият Саламаттыкты сактоо министрлигинин көрсөтмөсүнө ылайык коронавирустан коргонуунун жолдорун эске алууга чакырды.