ЖАМК кызматкерлер төшүнө тагып жүрүүчү видео регистраторлорду презентациялады

Жазаларды аткаруу мамлекеттик кызматында кызматкерлер төшүнө тагып жүрүүчү видео регистраторлорду презентациялады. Бул тууралуу аталган кызматтан билдиришти.

Иш-чарага ЖАМКнын төрагасы Мелис Турганбаев, ЖАМКнын коомдук кеңешинин төрайымы Чолпон Өмүрканова, "Hytero" компаниясынын Өзбекстандагы өкүлү, инженер Илья Марченко катышты.

Кеңешмеде өзбекстандык өкүлдөр өздөрү сунуштап жаткан видео регистраторлор тууралуу айтылып, суроолорго жооп берилди.

"Видео регистраторлорун төшүнө таккан 16-мекеменин кызматкерлери аркылуу анын онлайн иштөө мүмкүнчүлүгү көзөмөлдөндү. Бул аппарат 24 саат бою түз эфирге чыгып, борбордук аппаратка көрүнүп турат. Видео регистратор видео, аудио материалдарды окуя болгон жерде тартуу, сактоо жана берүүгө ылайыкташып, камера менен катар микрофон коюлган. Анда 3G, 4G Wi-Fi тартып, үн байланышты камсыз кылып, кооптуу учурда сигнал берет", - деп жазылат маалыматта.

Буга чейин ЖАМКга бардыгы болуп 174 видео регистратор алынган жана 4 жабык жайларга таратылган. Мындай аппараттар кызматкерлердин коопсуздугун гана эмес, алардын жана соттолгондордун тартибин көзөмөлдөөгө чоң өбөлгө түзөт. Соттолгондор кызматкерлерди сөгүп же баш ийбестик жасай албайт.