АКШдагы коронавирус катталган круиздик лайнерде 2 Кыргыз жараны бар

АКШнын Калифорния штатындагы "Grand Princess" круиздик лайнериндеги эс алуучулардын арасында коронавирус менен жабыркагандар бар экени аныкталган. Буга байланыштуу Кыргыз өлкөсүнүн АКШдагы, Канададагы элчиликтери кошмо штаттардагы тиешелүү мамлекеттик органдарга жана "Princess Cruises" компаниясына кайрылган.

6-мартта аталган круиздик лайнерде эки Кыргыз жараны бар экендиги тууралуу расмий маалымат келип түштү дейт Тышкы иштер министрлигинин маалымат кызматынан.

"Элчилик Кыргыз жарандары менен түз байланышты. Лайнердеги Кыргыз жарандары ден соолугу жакшы экенин, экипаж мүчөлөрү күнүнө үч маал тамак берип жатканын, бардык жүргүнчүлөрдү каюталарда кармап жатканын айтышты. Учурда элчилик алар менен байланышта болуп, бул маселени көзөмөлдөп жатат", - дешти маалымат кызматынан.

"Grand Princess" круиздик кемеси медициналык жардамга муктаж болгон жүргүнчүлөрдү лайнерден түшүрүү үчүн бүгүн, 9-мартта Калифорниянын Окленд портуна бет алат деп кошумчалашты мекемеден.