Премьер-министр Мухаммедкалый Абылгазиев менен Орусия өкмөтүнүн төрагасы Михаил Мишустин телефон аркылуу сүйлөштү

Кыргыз Республикасынын премьер-министри Мухаммедкалый Абылгазиев менен Орусия Федерациясынын өкмөтүнүн төрагасы Михаил Мишустин телефон аркылуу сүйлөштү.

"Сүйлөшүүнүн жүрүшүндө өкмөт башчылар эки өлкөнүн кызматташтыгынын актуалдуу маселелерин жана ар кыл чөйрөдөгү биргелешкен долбоорлорду ишке ашыруунун жүрүшүн талкуулашты. Ошондой эле Евразия экономикалык бирлиги боюнча кызматташуу маселелерине, Кыргыз Республикасынын жана Орусия Федерациясынын эриш-аркак жылынын алкагында өткөрүүчү иш-чараларга көңүл бурулду. Мындан тышкары Мухаммедкалый Абылгазиев жана Михаил Мишустин валюта жана мунайзат рыногундагы кырдаал тууралуу пикир алмашып, дүйнөдө түзүлгөн экономикалык конъюнктуранын кесепеттерин азайтуу боюнча биргелешкен иш аракеттерди талкуулашты. Тараптар эки мамлекеттин элдеринин кызыкчылыгы үчүн кыргыз-орус алакасынын бардык багыттары боюнча өз ара кызматташууну улантууга жигердүүлүгүн билдиришти", - деп жазылат маалыматта.