Италияда абакта жаткандар коронавирустан улам козголоң чыгарышты. 7 киши каза болду

Италиянын бардык аймактарындагы абакта жаткандар көтөрүлүшкө чыгышып, анын кесепетинен 7 адам каза болду. Камакта жаткандардын баш аламандык чыгаруусуна коронавирустан улам киргизилген чектөөлөр себеп болгонун чет элдик басылмалар жазып чыгышты.

Маалым болгондой, абактагыларга жакындары жана достору менен жолугууга тыюу салынгандан кийин түрмөлөрдө баш аламандык чыккан. Көтөрүлүш Италиянын Милан жана Рим шаарларындагы абактарда башталган. Кийинчерээк Салерно, Модена, Неаполь, Фрозиноне, Верчелли, Алессандрия, Фоджадагы аймактарында жайгашкан 27 түрмөдө баш аламандык орун алып, камактагылар качып чыгышкан. Полиция кызматкерлери качкандарды кармоого үлгүрүшкөн. Көтөрүлүшчүлөр коронавирус эпидемиясына байланыштуу амнистия талап кылышкан.