ЖАМК: "Өмүр бою эркинен ажыратылган 200 адам ачкачылык жарыялады. Алардын талабы негизсиз"

Жазаларды аткаруу мамлекеттик кызматынын жаза мөөнөтүн өтөө жайларындагы өмүр бою эркинен ажыратылган 200дөй адам ачкачылык жарыялады. Бул тууралуу аталган мекеменин басма сөз кызматынан билдиришет.

Ага ылайык ЖАМКтын №1, №16 №19 жана №25 мекемелеринде отурган соттолуучулар сот жана прокуратура органдарынан алардын конституциялык укуктарын коргоп берүүнү талап кылышкан.

"Ачкачылык жарыялаган 200 адам соттук-укуктук реформанын алкагында кабыл алынган жаңы мыйзамдын негизинде алардын иши кайра каралыш керектигин билдиришкен. Ал эми Жаза аткаруу кызматы жазык мыйзамдары 2019-жылы өзгөртүлгөнүн жана андагы мунапыс берүү мыйзамына ылайык, алардын ишин кайра карап чыгуу боюнча 2019-жылы эле тиешелүү мекемелерге кайрылуу болгонун белгилешет. Бирок соттор аны канааттандыруудан баш тартып койгондуктан, ачкачылык жарыялоо негизсиз", - деп айтылат маалыматта.

Маалым болгондой, азыркы тапта ЖАМКтын жаза өтөө мекемелеринде өмүр бою эркинен ажыратылган 347 адам отурат.