"Ухан вирусу": Коронавирустан сакайгандардын саны боюнча Иран экинчи орунга чыкты

12-мартка карата статистикалык маалыматтарга токтолсок, дүйнөгө кулачын кенен жайган жугуштуу вирустан жалпы 126 миң 93 адам жабыркаган. Алардын ичинен 68 миң 211и сакайган, ал эми 4 миң 616 адам көз жумган.

Вирустун очогуна айланган Кытайда коронавирус менен жалпысынан 80 миң 929 адам жабыркаса, 3 миң 169 адам каза болду, айыккандардын саны 50 миң 298. Италияда жуктуруп алгандар - 12 миң 462, каза болгондор - 827, сакайгандар - 1045. Бул көрсөткүч менен Италия вирустун экинчи очогу бойдон калууда. Иранда жуктургандар - 9 миң, каза болгондор - 354. Иран вирустан сакайган адамдардын саны боюнча экинчи орунга чыкты. Анда 2 миң 959 жаран сакайган. Ал эми Түштүк Кореяда 7 миң 755 адам жабыркап, 60 жаран каза болгон. Азыркы учурда дүйнөнүн 100дөн ашуун өлкөсүндө коронавирус катталды.

Жогорудагы маалымат АКШдагы Жон Хопкинс атындагы университеттин сайтынан алынды. Аталган булак Саламаттыкты сактоо боюнча дүйнөлүк уюм, коронавирус катталган өлкөлөрдүн саламаттыкты сактоо министрликтери берген маалыматка таянып, сутка ичинде бир канча ирет жаңылоо менен вирустун тарашы боюнча статистиканы көзөмөл кылып жатат.