УКМК: "Фарид Ниязовдун билдирүүсү - кылмыш жоопкерчилигинен качуунун аракети"

Президенттик аппараттын мурдагы башчысы Фарид Ниязов кылмыш жоопкерчилигинен качып, коомчулукту адаштырууга аракет жасап жатат. Мындай билдирүүнү УКМКнын маалымат кызматы таратты.

Улуттук коопсуздук комитети Кой-Таш окуясы боюнча айыпталып жаткан Ниязов укук коргоо органдарын коомго жаман көрсөтүүнүн аракетин жасап жатат деп билдиришти.

"Фарид Ниязов Кой-Таш окуясы боюнча ишти саясатка айландырып, мурдагы өлкө башчы Алмазбек Атамбаевди жана анын тарапташтарын актоо аракетин көрүп жатат.

Кой-Таш окуясы боюнча УКМКнын кызматкерлери чыныгы ок эмес, атайын каражаттарды колдонууга мажбур болушкан жана буларды тастыктаган видео материалдар бар. Андыктан анын УКМКнын төрагасы Орозбек Опумбаев “Альфанын” жоокерлерине Атамбаевдин үйүнөн чыгып кетүүгө уруксат бербей, алар үчүн кооптуу абал жаратты деген айыбы негизсиз", - деп жазылат билдирүүдө.

Буга чейин 11-мартта Фарид Ниязов “Альфанын” бир жоокеринин өлүмү жана башка жоокерлердин ур-токмокко кабылышына Опумбаевди күнөөлөгөн билдирүүнү айткан.