"Кытайда коронавирус менен ооруган Кыргыз жараны балкондон кулап, ооруканага түшкөн". ТИМ окуя боюнча маалымат берди

Социалдык тармакка тараган "Кытайда коронавируска кабылган Кыргыз жараны 2-кабаттын балконунан секирип кетти" деген маалымат боюнча Тышкы иштер министрлиги билдирүү таратты.

"Пекиндеги Кыргыз элчилиги Кытайдын медициналык мекемесинин берген маалыматына таянып, окуя тууралуу төмөнкүлөрдү билдирди. 6-март күнү саат 09:20 чамасында Игу шаарындагы ооруканага ар кандай жаракат менен 1996-жылы туулган З.А. аттуу Кыргыз жараны келип түшкөн. Ал байкабастыктан ачык балкондон кулап түшкөнү маалым болгон. Андыктан бул кырсык коронавируска байланыштуу эмес. Медициналык жайдын администрациясы кыздын ден соолугуна байланыштуу Кыргыз өлкөсүнө жөнөтүү мүмкүн эместигин айтууда. Ал учурда тынымсыз медициналык көзөмөлдө турат жана тийиштүү медициналык жардам көрсөтүлүүдө. Учурда элчилик тарабынан Кыргыз жаранынын Кытайда дарылануусуна шарт түзүп, каражат жагын чечүү иш-чаралары жүргүзүлүүдө", - деп жазылат маалыматта.