Коронавирустун душманы ысырыкпы? Дарыгер Борбор Азия өлкөлөрүндө инфекциянын эмне үчүн катталбаганы тууралуу пикирин айтты

Дүйнөгө тез жайылып жаткан коронавирус инфекциясы Борбор Азия өлкөлөрүндө каттала элек. Мунун сыры эмнеде деген суроого медицина илимдеринин доктору, БУУнун алдындагы вакцина боюнча эл аралык институтунун башкы директорунун орун басары Михаил Фаворов өзүнүн пикирин Ташкентте өткөн конференция учурунда билдирди. Чет элдик басылмалардын маалыматына ылайык, Өзбекстандын саламаттыкты сактоо министри Алишер Шадманов Михаил Фаворов менен биргеликте жыйын өткөрдү. Анда Фаворов 11-мартта Монголияга келген франциялыктан коронавирус аныкталганын белгиледи.

"Биз өзбекстандык кесиптештерибиз менен бир өзгөчөлүктү байкадык. Учурда картадагы монгол үч бурчтугуна кирген бир катар өлкөлөрдө (Борбор Азия өлкөлөрү) коронавирус катталган эмес. Мунун себеби эмнеде деген суроонун үстүндө көп ойлондук, себеби - климаттын өзгөчөлүгү, кургак абасы же ысырык болушу мүмкүн деп жатабыз.

Азырынча алдын ала бир нерсени айтуу, божомолдоо болбогон кеп. Бирок Борбор Азия өлкөлөрүндө коронавирус жок деген факт бар. Коронавирус катталбайт деп үмүт кылам", - деген ал жыйында.

Учурда дүйнө жүзүндө 128 миң 343 адам коронавирус менен жабыркап, 4 миң 720 адам каза болду.