Казакстандын 2 жараны коронавирус менен жабыркаганы аныкталды

Казак 2 жаранынан коронавирус аныкталды. Алар Германиядан келгенин казак басылмалары Саламаттыкты сактоо министри Елжан Биртановго шилтеме берүү менен жазып чыгышты.

"Өзүңөр билгендей, биз 3 айдан бери коронавирустун өлкө аймагына кирбеши үчүн бардык тиешелүү чараларды колдонуп жатабыз. Бүгүн, 13-мартта Германиядан келген жарандар коронавирус менен жабыркап жатканы аныкталды. Алар Алматы шаарындагы стационарга жеткирилип, карантинге алынды. Бардык тиешелүү чаралар көрүлүп жатат", - дейт Казакстандын саламаттыкты сактоо министри.

Кечээ, 12-мартта Казакстанда бир катар коомдук жайлар убактылуу жабылып, 15-марттан тарта колледждер жана жогорку окуу жайлар онлайн окууга өтөрү маалымдалган.

Буга чейин Казакстандын башкы санитардык дарыгери Жандарбек Бекшин коронавирус 11-16-март аралыгында Казакстанда катталышы мүмкүн деп билдирген эле. Бул билдирүүдөн кийин Елжан Биртанов "Башкы санитардык дарыгердин айтканы статистикалык моделдөө аркылуу жасалган божомол гана" деп жооткоткон комментарий берген болчу.

Алматы шаары менен Бишкек шаарынын аралыгы 240 чакырым аралыкты түзөт.