Өмүрбек Бабанов тун кызын турмушка узатат

Экс-депутат Өмүрбек Бабанов тун кызы Айперини турмушка узатат. Бул тууралуу бир катар жергиликтүү маалымат каражаттары жеке булактарына таянуу менен жазышууда.

Ага ылайык, үйлөнүү үлпөт той Түркиянын Стамбул шаарында өтүшү мүмкүн. "Республика" партиясынын мурдагы лидери Бабанов Чүй облусунун экс-губернатору Азамат Кангелдиев менен куда болору жазылат маалыматта. Ал 2010-2011-жылдары "Ата-Журт" партиясынан Жогорку Кеңеште депутат дагы болгон.

Айрым маалыматтар боюнча Айпери 23 жашта, Лондондогу окуу жайлардын биринде билим алат. Бишкектеги №61 мектепти аяктаган. Басылмалар Айперинин социалдык тармактагы досторунун арасынан Санжар Кангелдиев аттуу колдонуучу бар экенин жазышкан. Ал дагы Лондондо окуйт.

Өмүрбек Бабанов жана жубайы Рита Бабанованын төрт баласы бар. Айпериден кийинки уулу Нурэмир Бабанов 2018-жылы Жалпы республикалык тесттен жогорку балл алып, "алтын сертификатка" ээ болгон. Ал да билимин чет элде улантууда.