Бишкекте өзбек дипломаттары катышкан жол кырсыгы боюнча кылмыш иши козголду

Бишкекте жол кырсыгына кабылып, бир айдоочуну сабап салган өзбекстандык дипломаттарга байланышкан окуя боюнча кылмыш иши козголду. Бул тууралуу 26-августта Бишкек ШИИБинен билдиришти. Бул иш Бишкектин Биринчи Май РИИБине өткөрүлүп берилди. "Жол-кайгуул кызматынын жана Биринчи Май РИИБинин кызматкерлери элчиликтин айдоочусун күбө катары суракка алып жана дипломаттардан түшүнүк кат ала алышкан эмес. Буга алардын дипломатиялык кол тийбестиги себеп болду. Учурда жол кырсыгынын келип чыгышы жана айдоочунун сабалышынын себеби такталууда",- деп билдиришти ШИИБден. Эскерте кетсек, 23-августта Бишкекте Өзбекстандын КРдагы элчилигинин кызматкерлери катышкан жол кырсыгы болуп, дипломаттар окуяга катышкан айдоочулардын бирин сабап салышкан эле. Алардын мас экендиги белгилүү болду. Дипномурлуу Тойота Прадо унаасын ошол учурда элчиликтин биринчи катчысы М.Хайриддинов башкарып келе жатыптыр. Тойота Москва-Раззаков көчөлөрүнүн кесилишинен Жигули унаасын сүзүп кетип, мас дипломаттар Жигулинин айдоочусу Ж.Кадыровду сабап салышкан.