Ош шаарынын мэри борбордук базарды кыдырып, элге түшүндүрүү иштерин жүргүздү

Ош шаарынын мэри Таалайбек Сарыбашов вице-мэрлер жана тиешелүү кызматтын жетекчилери менен бүгүн, 15-мартта борбордук базарды кыдырып чыгышты.

Калаа башчысы азык-түлүк саткан соодагерлерге түшүндүрүү иштерин жүргүзүп, тургундарды дүрбөлөңгө түшпөөгө чакырды. Унга болгон баа көзөмөлгө алынаарын, абалдан пайдаланып бааны өз алдынча көтөргөн соодагерлерге укук коргоо органдары чара көрө турганын билдирди. Мэр шаардагы “Тулпар ун” комбинатынан да кабар алып, комбинаттын жетекчилигине шаарды ун менен камсыздоодо бааны туруктуу кармоону айтты.

"Ош шаарындагы ун комбинатында 1-сорттогу ундун бир кабы 1350 сомдон сатылууда. Казакстан менен чек ара ачык болгондуктан ундун баасы көтөрүлбөйт. Бааны себепсиз көтөргөндөргө чара көрүлөт. Ун комбинатына 300 тонна ун, миң тонна буудай алып келинет. Ундун запасы жетиштүү. Эң негизгиси ден соолугуңуздар болсун!”, - деди мэр.

Айрым соодагерлер комбинаттан бир кап унду 1350 сомдон алып, 1800 сомго чейин өз алдынча баа коюп сатып жаткандыгы маалым болду. Бул боюнча тиешелүү органдар иш алып барышууда.

Кечээ, 14-мартта айрым базарларда азык-түлүк товарларын массалык түрдө сатып алуу болуп, баалар жогорулаган. Кийинчерээк вице-премьер-министр Эркин Асрандиев Кыргыз өлкөсүндө азык-түлүктөрдүн, калк керектөөчү негизги товарлардын, тамак-аш продуктуларынын запасы жетиштүү экенин айтып, тынчсызданууга, бааларды көтөрүүгө негиз жок деп билдирген.