Чүйдө коронавирус тууралуу жалган маалымат тараткан 27 жаштагы жаран кармалды

Чүйдө коронавирус тууралуу жалган маалымат тараткан 27 жаштагы айым кармалды. Ал мессенжер аркылуу "Ысык-Ата районундагы Ивановка айылына коронавирус менен жабыркаган жарандарды алып келишүүдө" деген билдирүү таратканын Чүй ОИИББинин басма сөз кызматынан кабарлашты.

"Бул факты Кылмыштардын жана жоруктардын бирдиктүү реестрине катталып, сотко чейинки өндүрүш иши башталган. Ыкчам тергөөнүн жүрүшүндө билдирүү тараткан делинип 27 жаштагы Н.Н. кармалды. Ал аталган аймактагы ооруканада тиш доктур болуп иштей турганы аныкталды.

Кармалган жаран эжесине туура эмес маалымат жиберип алганын, билдирүү андан ары эжеси аркылуу тарап кеткенин айтты.

Учурда Чүй ОИИББи тарабынан жалган маалыматтарды жайылткан адамдарды издөө иштери улантылып жатат", - деп билдиришти мекемеден.