Коронавируска байланыштуу Казакстан чек араларына убактылуу чектөө киргизди

Бүгүнтөн, тагыраагы 15-марттан баштап коронавирустун Казакстандын аймагына кирүү тобокелчилигин азайтуу максатында чек арадан өтүүгө жана кирүүгө убактылуу чектөө киргизилди. Мындай чечим Казакстандын өкмөтү тарабынан кабыл алынган токтомдо айтылат.

"Казакстан Республикасынын жана чет мамлекеттердин дипломатиялык кызматынын өкүлдөрү, ошондой эле Казакстандын Тышкы иштер министрлигинин чакыруусу менен өлкөгө келе турган эл аралык уюмдардын, делегациялардын мүчөлөрүн эске албаганда Казакстандын аймагына унаалардын бардык түрү (жеңил жана оор жүк ташуучу) менен кирүүгө жана Казакстандын аймагынан чыгууга чектөөлөр киргизилсин", - деп жазылат расмий документте.

Кыргыз Республикасынын тышкы иштер министри Чыңгыз Айдарбеков менен Казакстандын тышкы иштер министри Мухтар Тлеуберди бүгүн сүйлөшүүлөрдү жүргүзүштү. Анда Мухтар Тлеуберди бүгүнкү күндө Кыргыз өлкөсү менен Казакстандын ортосундагы транзиттик жүктөрдү алып өтүүдө тыюу салынбаганын белгиледи. Ошондой эле коңшу өлкөнүн министри өзгөчө кырдаалга байланыштуу мындан аркы чечимдер кабыл алынарын кошумчалады.

Казакстандын президенти Касым-Жомарт Токаев коронавируска байланыштуу өлкөдө өзгөчө кырдаал жарыялоо тууралуу жарлыкка кол койду. Ага ылайык, өзгөчө кырдаал 16-мартта күчүнө кирип 15-апрелге чейин созулары кабарланды.